Luk 23:13-25 | YomNWM | STEP | Pilatu wukutikisa bapfumu banganga Nzambi, bakulutu ba batu va kimosi ayi batu. Wuba kamba :

Luke 23:13-25

Bazengila yesu nkanu wu lufua.

(Matayi 27.15-28 ; Malako 15.6-15 ; Yowani 18.39-40 ; 19.4-16)

13 Pilatu wukutikisa bapfumu banganga Nzambi, bakulutu ba batu va kimosi ayi batu. Wuba kamba :

14 —Beno lundatiningi mutu wawu bu lumfundidingi ti niandi wulembu vukumuna batu. Vayi tala minu veka mbeni kunsambisa va meso meno ayi ndisi mona kadi diambu di mbimbi ko mu mutu wawu mu mambu momo lulembu mfundila. 15 Elode mamvandi kasi mona diambu di mbimbi ko bila wutuvutudidi niandi. Mutu wawu kasi vanga ko bila kioki kafueti vondulu. 16 Diawu ndieka kunzubisa bikoti bosi ma ndiyekula.

[ 17 Pilatu wuba kifu ki kuba totudilanga mutu wumosi wu nloko mu kadikanyengo ^{▼▼Buku kiaki kisi ko mu minkanda minkaka.}.]

18 Vayi nkangu woso wuyamikina :

—Vondisa mutu wowo ; totula Balabasi !

19 Balabasi beni wukotusu mu nloko mu diambu di khindu yimosi yiba mu divula, ayi mu diambu di vonda batu.

20 Vayi Pialatu wuzola totula Yesu, wubuela yuvula nkangu vayi wawu wuyamikina diaka :

21 —Mbanda va dikulusi ! Mbanda va dikulusi !

22 Buna wuyuvula diaka mu khumbu yintatu ti :

—Vayi mbimbi mbi kavengi e ? Ndisi mona kadi diambu di mbimbi kodiodi kafueti zengulu nkanu wu lufua. Ndieka kunzubisa bikoti bosi ma ndinyekula.

23 Vayi babuela sindisila mu ngolo ayi baluta buela yamikina ti kabandu va dikulusi. Buna yamikina kuawu ayi koko ku bapfumu zi zinganga Nzambi kununga.

24 Pilatu wubaka lunaku luvanga luzolo luawu. 25 Wuba totukila mutu wowo balomba, wowo wuba mu nloko mu diambu di khindu ayi mu diambu di vonda batu. Wuba yekudila Yesu muingi bamvangila boso bubela luzolo luawu.